Միշտ սիրել եմ մոդելավորումը, կարն ու ձևը, երազել եմ ունենալ ատելյե և ստեղծել գեղեցիկ հագուստներ ու նորաձևության կերպարներ: Դեռ շատ փոքր հասակից փորձել եմ տիկնիկներիս համար հագուստներ կարել, իսկ հիմա արդեն դա կանեմ մեզ համար: Այդ նպատակով ես եկա «Մխիթար Սեբաստացի» կրթահամալիրի քոլեջը դիզայն, հագուստի մոդելավորում և նախագծում սովորելու: Առաջին դասերին սովորեցինք, թե ինչպես պետք է օգտվենք կարի մեքենայից, ճիշտ է, հաջող չստացվեց, բայց առաջինը դեռ վերջինը չէ: Հետո սովորեցինք տարբեր տեսակի կարեր, այնուհետև սկսեցինք ձևել և չափսեր վերցնել: Նաև ունենք նկարչության դասեր, որտեղ փորձում ենք նկարել այն, ինչ կարող ենք պատկերացնել և վերարտադրել: Սկսեցինք բացի հագուստներից նաև դիմակներ նկարել և պատրաստել, իսկ հիմա արդեն պատրաստվում ենք դիմակահանդեսի, որտեղ պետք է հանդես գանք մեր իսկ պատրաստած հագուստներով, մենք դրանք որոշեցինք պատրաստել մանրանկարչության մոտիվներով: Փոքր-ինչ բարդ էր, բայց կարծում եմ ստացվեց այն, ինչ մենք էինք ցանկանում: Հուսով եմ, ամեն ինչ կլինի այնպես, ինչպես որ ես եմ երազել փոքր հասակում: Ես կկարողանամ հասնել երազանքներիս:
Արինա Հովսեփյան, Քոլեջ, 1-ին կուրս
Արհեստագործ 