Բադենը հաճախ նկարագրվում է որպես Գերմանիայի ամենահարավային գինեգործական շրջան, այն իրականում ոչ այնքան տարածաշրջան է, որքան տարբեր վարչաքաղաքական շրջանների խառնուրդ, որոնք ժամանակին գինի էին արտադրում Բադենի Մեծ Դքսության տարածքում:
Բադենի ամենահյուսիսային մասը զուգահեռ է Մոզելին և կապում է Ֆրանկոնիան և Վյուրտեմբերգը, մինչդեռ Բադեն-Բադենից հարավ գտնվող խաղողի այգիները սահմանի մյուս կողմում գտնվող Էլզասի հայելային պատկերն են։ Բոդենզեի ափին գտնվող երեք խաղողի այգիները գրեթե ամենահարավայինն են Գերմանիայում:
Տարածաշրջանի աշխարհագրական, երկրաբանական և կլիմայական պայմանների բազմազանությունը թույլ է տալիս այստեղ արտադրել գինիների լայն տեսականի՝ փափուկ Silvaner-ից և թեթև, կծու Gutedel-ից, մինչև լիարժեք Rulender և գրավիչ վարդագույն Weissherbst: Այնուամենայնիվ, տարածաշրջանը մասնագիտացած է գերմանական լավագույն կարմիր գինիների արտադրության մեջ: Բադենի գինիների բնորոշ առանձնահատկությունները որոշակի ջերմություն, կլորություն և քաղցրությունն են: Այս հզոր գինեգործական շրջանի խաղողի այգիները հիմնականում ձգվում են Սև անտառի արևմտյան սահմանի երկայնքով՝ նրա և Ֆրանսիայի սահմանների միջև: Արտադրողի եփած ձուկն ու աղցանները լավ համադրվում են այս տարածաշրջանի թեթև գինիների հետ։
Բադենը համարվում է գերմանական գինեգործության նոր շրջաններից մեկը, չնայած 1800 թվականին կար խաղողի այգիների ավելի քան 27,000 հեկտար (66,700 ակր), ինչը գրեթե երկու ամգամ ավելին էր, քան այսօր: Ճակատագրի հեգնանքով Բադենի խաղողի այգիները սկսեցին անկում ապրել, երբ Գերմանիան 1871 թվականին ֆրանկո-պրուսական պատերազմի արդյունքում գրավեց Էլզասի խաղողի լավ պահպանված և առատ այգիները: Անկումը շարունակվեց՝ չնայած 1881 թվականին Հագնաուում Բադենի գինու ասոցիացիայի ստեղծմանը քահանա և գինեգործ Հենրիխ Հանսյակոբի կողմից: 1918 թվականին՝ Էլզասը Ֆրանսիային վերադարձվելուց հետո, Բադենի գինու արտադրությունը շարունակեց նվազել հիմնականում ներդրումների բացակայության պատճառով։ 1920-ական թթ․ գինեգործության վրա բացասաբար են ազդել ժառանգական օրենքները, ինչի արդյունքում Բադենի խաղողի այգիները սկսել են մասնատվել ավելի փոքր հողամասերի: Մինչև 1950 թվականը, երբ Բադենում մնացել էր ընդամենը 6000 հեկտար (14800 ակր) խաղողի այգի, գինեգործությունը հասել էր իր անկման ամենաստորին աստիճանին։
Աղբյուրը՝ այստեղ։
Թարգմանությունը ռուսերենից՝ Արման Մելիքյանի
Արհեստագործ 