Սեբաստացու օրերի առթիվ մրգային մարմելադի իր բաղադրատոմսն է առաջարկում մայրենիի ուսուցչուհի Թամար Ղահրամանյանը:
Տնային պայմաններում մարմելադ պատրաստում են թթվաշ մրգերից, որոնց եփած խյուսը հեշտ է մակարդվում: Սովորաբար պատրաստում են խնձորից ու սալորից:
Կեղևում ենք խնձորը, կտրատում, լցնում կաթսան ու ավելացնում մի քիչ ջուր, որ եփելիս կաթսայի տակը չկպչի: (Սալորի դեպքում հեռացնում ենք կորիզները և եփում առանց ջուր լցնելու): Զանգվածն անցկացնում ենք փլավքամիչով ու դնում եփելու այնքան, որ նկատելիորեն գոլորշանա հեղուկ մասը: Ապա ավելացնում ենք մեկ կիլոգրամին կես կիլոգրամ հարաբերությամբ շաքարավազ ու շարունակում եփել այնքան, որ զանգվածը թափանցիկ դառնա (2-3 ժամ): Պատրաստի զանգվածը լցնում ենք ջեռոցի էմալապատ թավաների մեջ, 1-2 սմ հաստությամբ և թողնում չորանալու: Չորացնել կարելի է թե´ ամռանը արևի տակ, թե´ տարվա մնացած եղանակին՝ տանը: Չորացնում ենք՝ լերդացած զանգվածը շրջելով, այս գործընթացը շատ երկար է տևում, մինչև պնդանա և ջրային հետք վրան չմնա: Որպեսզի արագ չորանա, կարելի է լերդացած զանգվածը գաթայի դանակով նախապես կտրատել փախլավայաձև: Լիովին չորանալուց հետո թաթախում ենք շաքարավազի մեջ և դասավորում բանկաների մեջ: Այս բնական քաղցրավենիքը կարելի է ողջ տարին ունենալ տանը:
Բաղադրությունը՝
1 կգ խնձոր կամ սալոր, 0,5 կգ շաքարավազ:
Հ. Գ. Խնձորի կեղևը մի´ շտապեք դեն նետել, լցրե´ք բանկայի մեջ, մինչև ծայրը ջրով ծածկե´ք, ավելացրե´ք մի սուրճի բաժակ շաքարավազ և թողե´ք թթվի: 40 օր անց կունենաք պատրաստի խնձորի քացախ:
Գրի առավ Դիանա Հարությունյանը, Ավագ դպրոց, 12-րդ դասարան
Արհեստագործ 